Gaurkotasuna / 29 urria, 2024
- Sarah Connolly mezzosopranoaren emanaldi bakarlaria izango dute.
- Mahlerren Rückert-Lieder eta Brucknerren "Wagner" 3. sinfonia interpretatuko dituzte.
- Kursaal Eszenako klasiko-denboraldiko sarrerak kursaal.eus webgunean eta Kursaaleko leihatiletan salgai.
Urriaren 30ean, Pablo Heras-Casado granadar zuzendari ospetsuak, Madrilgo Errege Antzokiko zuzendari gonbidatu nagusiak, debuta egingo du Kursaal Eszenan, Anima Eterna Brugge garaiko instrumentuen orkestraren buru dela. Atriletan izango dituzte Anton Brucknerren 3. Sinfonia ("Wagneriarra") eta Gustav Mahlerren Rückert Lieder xarmangarriak, Sarah Connolly mezzosopranoak interpretatuko dituenak. Kursaal Eszenako kontzertuetarako sarrerak eros daitezke Kursaaleko leihatiletan eta kursaal.eus webgunean.
Urtean sei aldiz biltzen da Anima Eterna Brugge, pasio partekatu baten inguruan elkartzen den nazioarteko orkestra-musikari talde bat. Duela hogeita hamar urte baino gehiagotik hona, 1750 eta 1945 artean idatzitako musika berreskuratzen du, bere iturri historikoa abiapuntu hartuta. Emaitzak harrigarriak izaten dira askotan, txundigarriak batzuetan. Beti berriak. 2021az geroztik, Pablo Heras-Casadok, Bart Van Reynek eta Midori Seilerrek, besteak beste, beren norabide propioa markatzen dute orkestrarekin elkarrizketan, Mozartetik Clara Schumannera, Brucknerretik Wagner eta Bartókera. Musika-pertsonalitate indartsu horiek oso desberdinak izan arren, guztiek helburu komun bat partekatzen eta errespetatzen dute: gure memoria kolektiboa gero eta gehiago aberastea, Anima Eternako musikariekin batera. Ahots berri horiekin, Anima Eternaren sortzaileak, Jos van Immerseelek bere sorkuntzari etorkizun iraunkorra bermatu nahi dio. Horregatik jarraitzen du orkestrarekin lanean, berau zuzentzen, eta bere ondare artistikoa orkestraren artxiboak irekiz transmititzen dela ziurtatzen du.
Pablo Heras-Casadok arrakasta nabarmena lortu du antzinako musikatik eta historikoki informatutako interpretaziotik literatura sinfoniko eta operistiko handira eta musika garaikidera doan errepertorio zabala zuzenduz; Heras-Casado erregularki aritzen da honako hauekin: Philharmonia Orchestra, Radio Franceko Orkestra Filarmonikoa, Berlingo Staatskapelle, Municheko Filarmonikoa, Elbphilharmonie Orchester NDR, Symphonieorchester des Bayerischen Rundfunks, SWR Symphonieorchester, Vienako Sinfonikoa, Orchestra dell 'Accademia Nazionale di Santa Cecilia, Filarmonica della Scala, NHK Symphony Orchestra, San Francisco, Chicago, Pittsburgh, Minnesota, eta Filadelfiako orkestra sinfonikoak, Los Angelesko orkestra filarmonikoa eta Montrealeko orkestra sinfonikoa.
Sarah Connolly Dame Commander of the Order of the British Empire, Commander of the British Empire eta Royal Philharmonic Societyko kide da, musikari emandako zerbitzu nabarmenengatik. 2023an, Erregearen Domina eman zioten musikaren alorrean. Aldeburgh, Edinburgo, Luzerna, Salzburgo eta Tanglewoodeko jaialdietan abestu du, baita BBC Promsen ere, non 2009an bakarlari izan zen Azken Gauean. Opera arloko bere konpromisoei esker, mundu osoan barrena aritzen da, Metropolitan Operatik Royal Opera Housera, Parisko Operara, Milango La Scalara, Viena eta Municheko Opera Estataletara eta Bayreuth, Glyndebourne eta Aix-en-Provence jaialdietara.
ANIMA ETERNA BRUGGE
Pablo Heras-Casado, zuzendaria; Sarah Connolly, mezzosopranoa
Urriak 30, 19:30. Kursaal Auditorioa. 66 / 53 / 42 / 34 / 11 €
