Gaurkotasuna / 7 urtarrila, 2025
Kursaal Kongresu Jauregiak eta Miramar Jauregiak askotariko kongresu eta ekitaldien programazioa hartu dute 2024an, bilera profesionalak egiteko erreferentziazko egoitza direla bermatuz. Urtean zehar, bi egoitzetan 345 ekitaldi izan dira, eta hainbat sektoretako 130.000 profesionalek baino gehiagok parte hartu dute.
Ondarea uzten duten ekitaldiak
Hirian egiten diren kongresu eta ekitaldi profesionalek agenda dinamizatzeaz gain, aztarna eta ondare iraunkorra uzten dute lurraldean, ezagutza, zientzia eta berrikuntza bultzatuz eta herritarrengan eragin positiboa sortuz.
Antolatutako 345 ekitaldietatik 42 biltzar eta konbentzio, 293 jardunaldi eta bilera (ekitaldi korporatiboak eta pizgarriak barne) eta 10 azoka izan dira. Nabarmentzekoa da nazioarteko topaketen garrantzia, mundu osoko profesionalak erakarri baitituzte. Horien artean daude, besteak beste, International Water Association Waterloss Conference (IWA) eta International Quantum Matter Conference (QUAMTUMatter), baita BioEquity Europe, Travel Blogger Exchange Europe (TBEX) eta European South Atlantic Biophysics Congress (ESAB-YSS) ere.
Nazioarteko beste kongresu batzuk, hala nola International Symposium on Laser Precision Microfabrication (LPM), Lubrication Management and Technology Conference (LUMBAT) eta Biennial Hemingway Society Conference, nabarmenak izan ziren egutegian, eta erakargarritasun handia lortu zuten.
Estatu mailan, Kursaal ere topaketa garrantzitsuen egoitza izan da, hala nola Zoru Pelbikoaren XI. Kongresu Nazionala (SEGO) eta Psikiatria eta Osasun Mentalaren XXVII. Kongresu Nazionala (SEPSM).
Club de Creativos eta San Sebastián Gastronomika biltzarrak ahaztu gabe, gastronomiaren eta diseinuaren zale eta profesional ugari erakartzen jarraitzen dituzten urteko hitzordu saihestezinak. Gainera, aurten Donostiako Zinemaldiaren 72. edizioak errekorrak hautsi ditu, 5.314 pertsona akreditaturekin et bertaratutako publikoaren zifrak hobetuz. Kursaal izan da, beste behin ere, jaialdiaren egoitza nagusia.
Arlo korporatiboan, SALTO WECOSYSTEM eta ABB Niessen-ek antolatutako topaketa bezalako ekitaldiak nabarmendu dira. Gainera, eSports LaLiga FC Pro Cup txapelketa zirraragarriaren egoitza izan zen Kursaal, izaera askotako ekitaldiak hartzeko duen moldakortasuna sendotuz.
Miramar Jauregia, halaber, izen handiko kongresuen egoitza izan da, hala nola Thalamocortical Networks, BCBL - Basque Center on Cognition, Brain and Language-ek antolatutakoa, XXIst International Workshop on Quantum Atomic and Molecular Tunneling Systems edo Nanotechnology Meets Quantum Information. Azkeneko biak Donostia International Physics Centerrek antolatuak.
Topaketa hauek ospatzeak hiriaren jarduera profesionala eta ekonomikoa dinamizatzeaz gain, Donostiak zientziaren, ikerketaren eta ezagutzaren gune garrantzitsu gisa duen posizioa indartzen du. Hainbat diziplinatako aditu eta profesionalak hartzen dituenez eta ideien trukea sustatzen duenez, hiria aurrerapen zientifikorako eta berrikuntzarako erreferentzia-leku gisa finkatzen da estatu eta nazioarte mailan.
