Gaurkotasuna / 5 ekaina, 2024
- Ekainaren 5 asteazkenean, 19:30etan, Kursaal Auditorioan.
- Bruckenerren Bosgarren Sinfonia interpretatuko dute.
- Sarrerak salgai webgune honetan eta Kursaaleko leihatiletan, %10eko deskontuarekin ESZENA KIDEentzat.
Datorren asteazkenean, ekainak 5, Kursaal Eszenak lehen aldiz hartuko du berean Kirill Petrenko, Berlingo Filarmonikaren zuzendari titularra, eta Gustav Mahler Jugendorchester (GMJO) gazte orkestra zuzenduko du, horren udaberriko biraren baitan. 1986an Claudio Abbado zuzendariak sustatutako interprete gazteen orkestra hori munduko gazte orkestrarik garrantzitsuena da. Kursaal Auditorioan emango duten kontzertuan Brucknerren Bosgarren Sinfonia interpretatuko dute. Proiektu berezi honetan lehenbiziko aldiz ari dira elkarlanean Kirill Petrenko eta GMJO, eta zuzendariak estreinakoz zuzenduko du Anton Brucknerren 5. Sinfonia.
Kirill Petrenko Berliner Philharmoniker orkestrako zuzendari titular eta artistikoa da 2019/20 denboralditik. Omsken (Siberia) jaioa, musika ikasketak bere jaioterrian eta ondoren Austrian egin zituen. Bere zuzendari karreraren oinarriak jarri zituen Meiningeneko Antzokiko Operan eta Berlingo Komische Operen zuzendari titular gisa. 2013tik 2020ra, Bavariako Estatu Operako musika zuzendari Nagusia izan zen. Gonbidatu gisa ere aritu da munduko opera-antzoki nagusietan, hala nola Wiener Staatsoper, Londresko Covent Garden, Parisko Opéra National, New Yorkeko Metropolitan Opera eta Bayreutheko Jaialdian; nazioarteko orkestra sinfoniko nagusiak ere zuzendu ditu, halaber.
Gustav Mahler Jugendorchester (GMJO) Vienan sortu zen 1986/87 denboraldian, Claudio Abbadoren ekimenez, eta 2007an Kulturaren Europako Fundazioak saritu zuen. Jatorrian, Abbadok musikari austriar gazteen sorkuntza musikala sustatu nahi izan zuen, Txekoslovakiako eta Hungariako errepublika sozialistetako kideekin batera, eta, hala, GMJO Ekialdeko Bloke zaharreko herrialdeetan entzunaldi irekiak egin zituen nazioarteko lehen gazte orkestra izan zen. 1992an, GMJO Europa osoko 26 urte arteko musikariei ireki zitzaien. Europa osorako gazte-orkestra den aldetik, gaur egun Europako Kontseiluaren babespean dago. Urtero Europako hogeita bost hiri baino gehiagotan egiten diren entzunaldietan, nazioarteko epaimahai batek 2500 hautagai baino gehiagoren artean aukeratzen ditu orkestrako kideak. Orkestrako musikari nabarmenak epaimahaikideak dira, eta orkestraren entsegu-aldietan errepertorioa atal desberdinetan prestatzeaz arduratzen dira. Aurtengo entzunaldiaren ondoren, orkestrak Verdi Pordenone Antzokian prestatu du bira hau, eta lehen kontzertua ere bertan izan zen. Kursaalera itzultzeaz gain, GMJO Ravenako Jaialdian eta Granadako Nazioarteko Musika eta Dantza Jaialdian ariko da lehen aldiz, eta Oviedoko Principe Felipe Biltzar Jauregiko Auditoriumera eta Erromako Parco della Musica Auditoriumera itzuliko da.
Kontzertu honetarako sarrerak webgune honetan bertan eta Kursaaleko leihatiletan eros daitezke, % 10eko deskontuarekin ESZENA KIDEentzat. ESZENA KIDE ekimenak hainbat abantaila eskaintzen dizkio publikoari, Kursaal Eszenako programazioko ekitaldietarako sarrerak erosten baititu; alta doakoa da eta kursaal.eus webgunean edo Kursaaleko leihatiletan egin daiteke.
GUSTAV MAHLER JUGENDORCHESTER + KIRILL PRETRENKO
Ekainak 5 asteazkena, 19:30. Kursaal Auditorioa. 66 / 53 / 42 / 34 / 11 €
