Gaurkotasuna / 27 maiatza, 2024
- Maiatzaren 29 asteazkenena, 19:30etan, Kursaal Auditorioan.
- Jean-Christophe Maillot, Monacoko konpainiaren zuzendari eta koreografoaren bertsioan.
- Sarrerak salgai eus webgunean eta Kursaaleko leihatiletan, %10eko deskontuarekin ESZENA KIDEentzat.
Maiatzaren 29an, Kursaal Eszenak Les Ballets de Monte-Carlo hartuko du; europar konpainia ospetsuak “Errauskine” baletaren klasikoa interpretatuko du Kursaal Auditorioan. Ekoizpen horretan, Jean-Christophe Maillotek, Montecarloko Balleten zuzendari eta koreografoak Perraulten ipuin ospetsuari heldu eta tradiziozkoa duen gozotasuna kentzen dio, desagertzen diren pertsonek geratzen direnen etorkizuna nola baldintzatzen duten modu hunkigarrian erakutsiz.
Funtsean, Prokofievek "Errauskine"ren inguruan zuen ikuspegi gizatiarretik abiatzen da Jean-Christophe Maillot: "ez da maitagarrien ipuin bateko pertsonaia soila, izaki bizidun bat da, sentitzen duena, bizia, eta haren patuak matxinatu egiten gaitu". Hortik aurrera, fantasiazkoarekin eta naturala denarekin jolastu eta erresonantzia ezagunak eta arrotzak biltzen dituen iruditeria osatzen da. Amaren oroitzapenak gidatuta, Errauskinek aitormena eta maitasuna bilatzen ditu estetika sofistikatudun gortearen gehiegikerien artean. "Errauskine" n, haren oina da ipuina egituratzen duen elementua; oin horren oinatzak eramango du Printzea bidaiatzera, bere unibertso itxia apurtzera, beste espazio batzuen bila abiatzeko; eta oinaren formagatik ezagutuko eta Printzea haren aurrean belaunikatuko da, lehen aldiz eta etiketa ororen kontra: aitortzaren seinale magikoa izango da hori, umiltasunarena, eta dantzariaren euste-punuta ere bada, hortik datozkio indarra, oreka eta handitasuna.
Les Ballets de Monte-Carlo, 1985ean birsortua, Monakoko Printzerriko arte-adierazpen ospetsuenetako bat da, eta Sergei Diaguilev Errusiako Balleten sortzaile ikonikoaren pasiotik sortu zen. Jean-Christophe Maillotek 1987an sortu zuen konpainiarentzako lehen koreografia, “Le Mandarin Merveille”, eta arrakasta handia izan zuen; 1992-1993 denboraldian bere aholkulari artistiko bihurtu zen, eta zuzendari koreografo izendatu zuten 1993an; Monte-Carloko Balletetara iritsi zenean, norabide berri bat markatu zuen, eta 50 dantzariko konpainia horren heldutasun- eta bikaintasun-maila azkar garatu zen; Maillotek 40 balet baino gehiago sortu ditu konpainiarentzat, eta horietako hainbat nazioarteko beste konpainia handien errepertorioan daude jada. Gaur egun, Monte-Carloko Baletak mundu osotik dira deituak “Roméo et Juliette” (1996), “Cendrillon” (1999), “La Belle” (2001), “Le Songe” (2005), “Casse-Noisette Compagnie” (2013), “La Mégère apprivoisée” (2017), “Abstract/Life” (2018), “Core meu” (2019), “Coppél-i. A.” (2019) eta abarri esker.
Ikuskizun honetarako sarrerak www.kursaal.eus webgunean eta Kursaaleko leihatiletan eros daitezke, % 10eko deskontuarekin ESZENA KIDEentzat. ESZENA KIDE ekimenak hainbat abantaila eskaintzen dizkio publikoari, Kursaal Eszenako programazioko ekitaldietarako sarrerak erosten baititu; alta doakoa da eta kursaal.eus webgunean edo Kursaaleko leihatiletan egin daiteke.
LES BALLETS DE MONTE-CARLO, "ERRAUSKINE"
Maiatzak 29 asteazkena, 19:30. Kursaal Auditorioa. 50 / 40 / 32 / 26 / 11 €
