Gaurkotasuna / 22 azaroa, 2023
Jasangarritasunerako eta energia berriztagarrien sustapenerako urrats garrantzitsu batean, Kursaal Kongresu Jauregiak eguzki-plaka fotovoltaikoak ezarri ditu sabaian. Eguzki-planta autohornikuntzarako erabiliko da oso-osorik. 258 kW-rainoko kapazitatearekin, Kursaalari aukera emango dio bere elektrizitatea sortzeko eta kanpoko energia-iturriekiko duen mendekotasuna murrizteko.
Proiektuak 185.000 euroko inbertsioa behar izan du, eta zati batean finantzatu da Europar Batasunaren funtsekin - NextGenerationEU, Berreskuratze, Eraldaketa eta Erresilientzia Planaren barruan, Trantsizio Ekologikorako eta Erronka Demografikorako Ministerioaren, Energia Dibertsifikatzeko eta Aurrezteko Institutuaren (IDAE) eta Energiaren Enpresa Erakunde Publikoaren (EEE) laguntzarekin.
Eguzki-plaka fotovoltaikoek, eguzki-argia elektrizitate bihurtzen duten siliziozko gelaxkek osatuak, Jauregiaren sabaiaren zati handi bat estaltzen dute, zehazki 783 m2 auditorioaren sabaia eta 327 m2 ganbera-aretoarena. Instalazioa eraikinaren estetika arkitektonikoan integratzeko moduan diseinatu da, itxura bereizgarria arriskuan jarri gabe. Gainera, eguzki-energiaren ekoizpena maximizatzeko orientazio optimoa kontuan hartu da.
Kursaaleko eguzki-energiaren instalazioak urtean 210.000 kWh elektrizitate inguru sortuko dituela kalkulatzen da, hau da, eraikinaren energia-beharren % 13 inguru. Energia berriztagarri horrek atmosferara 52.500 kg karbono dioxido isurtzea saihestuko du, 63 etxebizitzaren urteko batez besteko kontsumoaren baliokidea. Horrela, klima-aldaketaren aurkako borrokan eta hiriko karbono-aztarnaren murrizketan lagunduko du. Era berean, azpimarratu behar da biltzar-jauregiak erabiltzen dituen energia-iturri guztiak % 100 berriztagarriak direla.
Kursaal Kongresu Jauregia kudeaketan duen bikaintasunagatik eta izaera berritzaileagatik erreferente dena, jasangarritasunean ere hala izan nahi du. Eguzki-plaka fotovoltaikoak gehituz Kursaalak erakusten du bere konpromisoa eta ingurumena errespetatuko duen energia-eredu garbiago bat garatzeko duen ekarpena. Guzti hauek, Nazio Batuek ezarritako Garapen Jasangarriko Helburuekin (GJH) lerrokatuta.
