Gaurkotasuna / 13 azaroa, 2023
- Bihar asteartea, azaroak 14, "Elementuak eta furiak" programa interpretatuko dute Kursaal Auditorioan.
- Sarrerak salgai kursaal.eus webgunean eta Kursaaleko leihatiletan.
Bihar, azaroaren 14an, asteartea, Jordi Savall musikari kataluniarra Kursaal Eszenara itzuliko da, berak 1989an sortutako Le Concert des Nations orkestrarekin batera. Haendel, Gluck eta Jean-Philippe Rameauren lanak biltzen dituen "Elementuak eta furiak" izeneko programa interpretatuko dute. Kontzertu honetarako sarrerak www.kursaal.eus webgunean eta Kursaaleko leihatiletan eros daitezke.
Jordi Savall (Igualada, 1941) bere belaunaldiko musikari balioaniztunenetakoa da. Kontzertista, pedagogo, ikertzaile eta proiektu berri musikal zein kulturalen sortzaile gisa egiten duen jarduerari esker, musika historikoaren errebalorizazioaren eragile nagusietako bat da gaur egun. Berrogeita hamar urtetik gora daramatza ahaztutako antzinako musikako piezak bilatzen eta ezagutarazten; horiek irakurri eta bere da gamba biolarekin edo zuzendari gisa interpretatzen ditu. Urteotan hainbat musika-talde sortu ditu, esaterako, Hespèrion XXI (1974), Montserrat Figuerasekin batera; La Capella Reial de Catalunya (1987) eta Le Concert des Nations (1989); horiekin batera, munduari eta milioika musikazaleri proiektatzen dien emozio- eta edertasun-unibertso bat arakatu eta sortzen du. Bere ibilbidean zehar, Erdi Aroko, Errenazimentuko, Barrokoko eta Klasizismoko errepertorioak biltzen dituzten 230 disko baino gehiago grabatu eta argitaratu ditu, Hispaniako eta Mediterraneoko musika-ondarean arreta berezia jarrita. Sari ugari jaso ditu, hala nola Midem Awards, International Classical Music Awards eta Grammy Award.
Le Concert des Nations orkestrak, Gramophone Magazine-k “2023 urteko orkestra” sarirako izendatua, François Couperin-en “Les Nations” obrari zor dio izena; kontzeptu horrek aipamena egiten die musika-gustuen baturari eta Europan arteak Argien Mendeko marka betiko eramango zuela dioen premonizioari. Herrialde latinoetatik (Espainia, Latinoamerika, Frantzia, Italia, Portugal, etab.) etorritako musikariek osatutako lehen orkestra izan zen, guztiak ere garaiko instrumentu originalekin eta irizpide historikoekin antzinako musika interpretatzen nazioarteko aditu nabarmenak.
Oraingoan, Haendelen "Water Music" ("Uretako musika"), Christoph Willibald Glucken "Don Juan ou le festin de Pierre" ballet pantomima eta Jean-Philippe Rameauren "Les Borèades" piezak batzen dituen programa aurkeztuko dute. "Water Music" Haendelen lan instrumental ezagunena izan zen luzaroan; Savallek bi suitetan antolatu du multzoa, bata re eta sol suiteetan zentratua, bestea fa suitean; partitura horretan Haendelek oinarri germaniko sendoa, formazio italiarra eta gustu frantsesaren zein tradizio ingelesaren asimilazioa erakusten ditu. "Don Juan ou le festin de Pierre", Gluckek 1761ean Don Juanen kondairari buruz idatzitako balleta, XVIII. mendeko balletaren praktika eszenikoarekin estuki lotuta dago, bai musika-tradizioari dagokionez, bai formari dagokionez. "Les Boréades" (1763) Rameauren azken tragedia musikala da; guztiz originala, Rameauren artea garaiko ezaugarrietara mugatzen da, Luis XV.aren estiloaren ezaugarri diren rococo, atsegin, eruditu eta fantasiazkoetara, eta Ilustrazioaren pentsamendu filosofikoaren eferbeszentziara, ausardia kontzeptuala eta formen arintasuna elkartuz.
JORDI SAVALL & LE CONCERT DES NATIONS
Azaroaren 14 asteartea, 19:30. Kursaal Auditorioa. 55/ 44 / 35 / 28 / 11 €
