Gaurkotasuna / 28 urria, 2021
- Angelin Preljocaj-en koreografiaizenburu bereko Schuberten Lieder-ak ditu oinarri eta horiek zuzenean interpretatuko dituzte Thomas Tatzl baritonoak eta James Vaughan pianistak.
Azaroaren 2an, asteartearekin, Ballet Preljocaj, 1984. urtean Angelin Preljocaj koreografoak sortutako konpainia Donostian aurkeztuko da Winterreise ikuskizunarekin. 2019an estreinatutako 12 dantzarientzako ballet horrek Franz Schuberten Die Winterreise (Neguko bidaia) Lieder zikloa eta Wilhelm Müller-en poemak hartzen ditu oinarri, bizitzan barrena bidaia bat irudikatzeko.
Angelin Preljocaj-en hitzetan, Winterreise koreografiak “Wilhelm Müller-en poemak gogoratzen dituzten irudiei, inpresionismo erromantikoari eta hark helarazten dituen emozio eta sentimenduei jarraitzen die. Astiro-astiro gertatzen den suizidio luze bat, horixe da oinarri dramatiko-koreografikoa. Bere buruaz beste egin nahi duen norbaitek neguko bidaia bati ekiten dio: bidean ikusi eta topatzen duen orok eramaten du amaiera horretara, galdutako maitasunak bultzatuta. Bidaiari bakartia ez du dantzari jakin batek interpretatzen. Alderantziz, haren izaeraren alderdi aldakorrak eta besteengana hurbiltzeko moduak bakarkako dantzarien, bikoteen edo interprete ugarien bitartez adierazten dira aldi berean”. Preljocaj-entzat, ganbera musika oinarri duten koreografietan, Winterreise kasu, konplizitate berezia sortzen da dantzarien, musikarien eta publikoaren artean, “magiazko triangelu bat, nolabait esateko”.
Bere lan koreografikoa gauzatzerakoan, Angelin Preljocaj-ek inspirazio-iturri ezberdinetatik edan ohi du eta hainbat esparrutako artistekin aritzen da elkarlanean: musika (Goran Vejvoda, Air, Laurent Garnier, Granular Synthesis, Karlheinz Stockhausen), arte bisualak (Claude Lévêque, Subodh Gupta, Adel Abdessemed), diseinua (Constance Guisset), moda (Jean Paul Gaultier, Azzedine Alaïa, Igor Chapurin), marrazketa (Enki Bilal) eta literatura (Pascal Quignard, Laurent Mauvignier)… Preljocajen ekoizpenek konpainia askoren errepertorioa osatzen dute, eta konpainia horietako askok eskatzen dizkiote jatorrizko ekoizpenak, bereziki Milango La Scalak, New Yorkeko Balletak eta Parisko Opera Nazionaleko Balletak. Izan ere, Winterreise Milango La Scalaren enkarguz ondu zuen, elkarlanean Montpellier-eko Dantza Jaialdiarekin eta Les Théatres – Grand Théâtre en Provence delakoekin. Konpainiaren jarduera biziaren erakusgarri, Kursaal Eszenan aurkeztu ondoren Bartzonako Liceun ikusgai izango den Winterreise balletaz gain, Le Ballet Preljocaj / Centre Chorégraphique National-ek honako ikuskizunekin biran ibiliko da azaroan: Beltxargen lakua (San Petersburgo eta Mosku), Deleuze/Hendrix, muntaia berriena (La Ciotat, Frantzia) eta Gravité(Sénart, Frantzia).
Dantza emanaldi horren ostean, Kursaal Eszenaren musika klasikoko denboraldiaren hurrengo hitzordua azaroaren 22an izango da, mundu mailako erreferentea den Philippe Jaroussky kontratenor ospetsuak kontzertua emango baitu, Farinelli eta Carestini, XVIII. mendeko kontratenor nagusienen ibilbidea hizpide hartuta.
Kontzertu horietarako sarrerak eros daitezke Kursaaleko leihatilan eta webgune honetan (hori da sarreren online salmentarako bide baimendu bakarra).
BALLET PRELJOCAJ. WINTERREISE
Azaroaren 22 asteartea, 20:00etan. Kursaal Auditorioa
40 / 32 / 26 / 21 / 11 €
